കള്ളപ്പണത്തെക്കുറിച്ച് വിവരം കൈമാറുന്നതിന് സര്‍ക്കാര്‍ പുറത്തുവിട്ട ഇ-മെയില്‍ വിലാസത്തില്‍ 72 മണിക്കൂറിനിടെ ലഭിച്ചത് 4,000ത്തോളം സന്ദേശങ്ങള്‍

കള്ളപ്പണത്തെക്കുറിച്ച് വിവരം കൈമാറുന്നതിന് സര്‍ക്കാര്‍ പുറത്തുവിട്ട ഇ-മെയില്‍ വിലാസത്തില്‍ 72 മണിക്കൂറിനിടെ ലഭിച്ചത് 4,000ത്തോളം സന്ദേശങ്ങള്‍.

blackmoneyinfo@incometax.gov.in എന്ന വിലാസത്തിലാണ് ഇത്രയും ഇ-മെയിലുകള്‍ ലഭിച്ചത്.

കള്ളപ്പണത്തെക്കുറിച്ചും അവ നിക്ഷേപിക്കുന്ന അക്കൗണ്ടുകളെക്കുറിച്ചും ദിനംപ്രതിയെന്നോണം നിരവധി വിവരങ്ങളാണ് സര്‍ക്കാരിന് ലഭിച്ചികൊണ്ടിരിക്കുന്നതെന്ന് ധനമന്ത്രാലയ വൃത്തങ്ങള്‍ സൂചിപ്പിച്ചു.

ധനമന്ത്രാലയത്തിന്റെ ഭാഗമായ ഫിനാന്‍ഷ്യല്‍ ഇന്റലിജന്‍സ് യൂണിറ്റ് വഴിയാണ് വിവരങ്ങള്‍ ശേഖരിക്കുന്നത്.

വിവരം ലഭിക്കുന്നമുറയ്ക്ക് ആദായ നികുതി വകുപ്പിന്റെയും എന്‍ഫോഴ്‌സ് മെന്റിന്റെയും നേതൃത്വത്തില്‍ രാജ്യത്തൊട്ടാകെ റെയ്ഡുകള്‍ നടത്തുന്നുണ്ട്. പുതിയതും പഴയതുമായ നോട്ടുകള്‍, കണക്കില്‍പ്പെടാത്ത സ്വര്‍ണം എന്നിവയാണ് പിടിച്ചെടുക്കുന്നവയിലേറെയും.